زہرا نگاہ کا اصل نام فاطمہ زہرا اور قلمی نام زہرا نگاہ ہے، آپ کی ولادت 14 مئ 1937 کو غیر منقسم ہندوستان کے شہر حیدر آباد دکن میں ہوئی۔ آپ کے والد قمر مقصود بدایوں سے تعلق رکھتے تھے، تلاش معاش کے سلسلہ میں حیدر آباد کو اپنا مسکن بنا لیا تھا اور تقسیم ہند کے بعد مستقل طور پر کراچی چلے گئے تھے۔ زہرا نگاہ کے گھر میں شروع سے ہی ادبی ماحول تھا جس میں آپ کے چھ بھائی بہن پروان چڑھے، سبھی بھائی بہنوں کی تعلیم و تربیت میں والدہ کا زیادہ ہاتھ رہا ، شعری و ادبی ذوق ورثہ میں ملا، آپ کے سبھی بھائی بہنوں نے اپنی منفرد پہچان بنائی، مشہور ڈرامہ نویس فاطمہ ثریا اور  مشہور براڈ کاسٹر اور محقق سارہ نقوی آپ کی بہنیں تھیں۔ مشہور مزاح نگار اور مصور  انور مقصود آپ کے بھائی ہیں۔ آپ نے اپنی ذاتی زندگی کو مخفی رکھا  اس لئے آپ کی شخصیت اور حالات زندگی کے بارے میں زیادہ معلومات عام نہیں ہیں حالانکہ آپ نے اپنی خودنوشت تحریر کی ہے لیکن اس کو شائع نہیں کیا ہے،  آپ کا کہنا ہے کہ یہ زندگی کے تجربات ہیں جو میں نے اپنے بچوں کے لئے قلمبند کئے ہیں اور وہ اسے پڑھنے کے بعد نذر آتش کر دیں گے۔

زہرا نگاہ بچپن سے ہی شاعری کی طرف راغب ہوئیں اور گیارہ سال کی عمر میں ایک نظم “گڈے گڑیا کی شادی“ لکھی تھی، چودہ پندرہ سال کی عمر میں باقاعدہ شاعری کا آغاز کیا، شروعات میں جگر مراد آبادی سے اصلاح سخن لینا چاہی لیکن انھوں نے یہ کہہ کر انکار کر دیا کہ تمھارا ذوق مستحسن ہی تمھارے کلام کی اصلاح کر دے گا ۔ آپ کے ذوق مستحسن نے مشق سخن جاری رکھی اور بہت جلد مشاعروں کی نمائندہ شاعرہ کے طور پر مدعو کی جانے لگیں۔ آپ کے خوبصورت مترنم لہجہ سے مشاعرہ کا ہال تالیوں اور واہ واہ کی آوازوں سے گونج اٹھتا تھا۔ بعد ازاں آپ کا کلام نقوش، سویرا، شاہراہ، اور فنون میں شائع ہونے لگا۔

زہرا نگاہ جب شاعری کے افق پر نمودار ہوئیں تو اس الزام سے بھی دو چار ہوئیں کہ انھیں کوئی بزرگ شاعر کلام لکھ کر دیتا ہے۔ لیکن جلد ہی آپ کی شاعری نے اس الزام کو جھوٹا ثابت کر دیا۔ ایک نو عمر لڑکی کی محبت، معاملاتِ عشق اور دبا سہما انداز یہ ثابت کرتا ہے کہ یہ ایک ٹین ایجر شاعرہ کا ہی کلام ہو سکتا ہے۔

آپ کی شاعری پر فیض احمد فیض کا اثر واضح طور پر دکھائی دیتا ہے لیکن باقاعدہ فیض کی تقلید نہیں کی ہے، زہرہ کی شاعری میں موضوعات کا تنوع ہے، آپ کے یہاں عورت کے جذبات ہیں تو اجتماعی مصائب کی روداد بھی ہے، عشق کے معاملات ہیں تو عالمی سیاست اور جنگ و جدال پر بھی نظر ہے۔ اپنے زمانے کا سیاسی شعور آپ کی شاعری میں نمایاں ہے ، عالمی منظر نامے پر بھی وسیع نظر ہے، بین الاقوامی سطح کی گھناؤنی سیاست اور ظلم و استحصال کو اپنی نظموں میں بخوبی اجاگر کیا ہے۔ افغانستان سے لیکر ویت نام تک پر نظمیں لکھی ہیں۔ آپ کی شاعری کا تجزیہ کرتے ہوئے نجمہ رحمانی صاحبہ رقمطراز ہیں :

“زہرا نگاہ کے غزلیہ کلام کے مقابلہ میں اکثر نظموں میں ان کی شخصیت کھل کر سامنے آتی ہے، یہاں انھوں نے گھر آنگن سے بین الاقوامی حدود تک بہت سے موضوعات کا احاطہ کیا ہے ۔ اپنی نظموں میں وہ ایک ماں کے روپ میں بھی سامنے آتی ہیں اور ایک گھریلو عورت کی شکل میں بھی، جس کے سامنے اپنے گھر کی زندگی، چھوٹی چھوٹی الجھنیں ہیں، ایک شادی شدہ عورت کے حساس دل کی دھڑکنیں اور اپنے ماضی سے بے پناہ انسیت ان کے یہاں جھلکتی ہے “

اتنی کہنہ مشق شاعرہ ہونے کے باوجود آپ نے بہت کم لکھا لیکن جتنا بھی لکھا اسے بڑی پذیرائی حاصل ہوئی۔ آپ کے صرف تین مجموعہ کلام شائع ہو کر منظر عام پر آئے۔ حکومت پاکستان نے آپ کی مختصر لیکن معتبر خدمات کے صلے میں "صدارتی تمغہ برائے حسن کارکردگی" عطا کیا ، آپ ابھی بقید حیات ہیں اور پاکستان میں مقیم ہیں

شعری مجموعے :

1.   شام کا پہلا تارا

2.    وقت

3.   فراق

4.    مجموعہ کلام (کلیات(