گمنام  شاعر ہاجؔر دہلوی کا اصلی نام  رگھونا تھ سنگھ تھا ، ان کی پیدائش دہلی  کے ایک معزز علمی وادبی چھتریہ خاندان میں 30 اکتوبر 1884ء کو ہوئی ، ان کے اباء و اجداد کا شمار دہلی میں ممتاز اور اعلیٰ مرتبت افراد میں ہوتا تھا ، ان کی ابتدائی تعلیم مشن اسکول دہلی سے ہوئی ،ذہین اور مطالعہ کے شوقین تھے ، انہوں نے میر ، سودا، غالب اور داغ  کے دیوان کا کم عمری میں مطالعہ کیا، 12 سال کی عمر سے شعر وشاعری کرنے لگے،انہوں نے باقاعدہ کسی سے اصلاح نہیں لی بلکہ اپنی ذہانت اور گھریلو ماحول  سے سخن میں نکھار پیدا کیا ،انٹر کی تعلیم کے دوران ہی صاحب دیوان شاعر ہوگئے ،1902 ء میں انٹر پاس کرنے کے بعد اپنے دادا حکیم منشی سردار سنگھ حسیؔب جو کہ شاعر تھے اور عربی و فارسی زبان میں غیر معمولی قابلیت کے حامل تھے ان سے کسب فیض کیا ،اس کے علاوہ ان کے پاس فارسی اور عربی کی قلمی اور قدیم کتابوں کا ذخیرہ تھا ان سے بھی استفادہ کیا ، دو سو کے قریب بوسیدہ کتابوں کو ازسر نو اپنے  فن خطاطی ( جس میں ان کو مہارت تھی )سے ان کو نقل بھی کیا ، اس کتب خانہ کی  کچھ کتابیں جو انہوں تیار کی تھیں مارواڑی لائبریری دہلی کو عطیہ کردیں اور ادارہ نے 'ہاجر ' کے نام سے الگ سیکشن بناکر ان کو  لائبریری میں ترتیب دیا ،حاذق ثانی حکیم منشی گوری شنکر سے فن طب کی بھی تعلیم حاصل کی ، 1906ء میں ان کے والد منشی رگھو بیر سنگھ جو دہلی کے محکمۂ پولیس میں سب انسپکٹر تھے  ان کا انتقال ہوگیا ،ان کے قبل از وقت  انتقال کے باعث ان  کی جگہ ملازمت مل گئی اور تقرری بھوپال میں ہوئی ، بھوپال میں انہوں نے چار سال ملازمت کی اور شعر وشاعری کا سلسلہ بھی جاری رکھا،طبیعت کو بھوپال کی فضا راس نہیں آئی تو ملازمت چھوڑ کر دہلی واپس آگئے ،1910ء میں انہوں نے 'دارالشفاء' نامی دواخانے کی بنیاد ڈالی ،بہت جلد دواخانے نے شہرت حاصل کرلی اور 'دارالشفا ء'شہر کا بہترین اور مستند دواخانہ بن گیا ویسے طبابت ان کا خاندانی پیشہ تھا ،آپ صبح وشام مطب کرتے اور دوپہر کو اپنی زیر نگرانی ادویات کو تیار کراتے تھے ان کاموں کی مصروفیت کے باعث ان کو دوسرے کاموں کیلئے فرصت نہیں رہی ،طبابت کی مصروفیات کی وجہ سے شعر وشاعری کا سلسلہ قریب قریب منقطع ہوگیا ،1911ء کے بعد سوائے فرمائشی غزلوں اور قصیدوں کے کوئی قابل ذکر تصنیف نہیں ملتی، عربی و فارسی کے علاوہ ان کو ہندی اور انگریزی میں  بھی مہارت حاصل تھی ،فن موسیقی اور مصوری کا بھی عمدہ ذوق رکھتے تھے ، شاگردوں کی غزلیں  بڑی توجہ سے درست کرتے تھے ،ان کے شاگردوں می  بابو ہیم چند صاؔبر ، لالہ بسنت لال افسوؔس، لالہ کشن چند اختؔر، لالہ تاراچند جوؔہر پلیڈر ، لالہ الفت رائے الؔفت، میاں محمود شاہ محؔمود،منشی  بدری پرشاد ؔشکوہ آبادی ، لالہ انوپ سنگھ حاضؔر وغیرہ قابل ذکر ہیں ۔

  ہاجؔر  دہلوی  شاعر ،حکیم اور عمدہ نثر نگار تھے ،انہوں نے شاعری میں سبھی اصناف سخن میں طبع آزمائی کی ان میں غزل ، مثنوی، قصیدہ، قطعات ، مسدس ،  مخمس ،سہرا ، نوحہ اور نظم بھی شامل ہیں ، ان کی طبیعت میں رنگینی تھی اس لیے شاعری میں عاشقانہ رنگ بہت گہرا ہے ، انہوں نے میر ،سودا، داغ اور  غالب کی  زمینوں پر بھی شاعری کی ، غالب کی زمین میں ان کا بیشتر کلام موجود ہے ، ان کے یہاں موضوعات کا تنوع ہے وہ ایک ہی احساس کو کئی جہتوں اور زاویوں سے پیش کرنے میں مہارت رکھتے ہیں ، وصل ، ہجر ، درد ، کسک  ان کے کلام میں جابجا ملتا ہے ، غزل میں روایتی رنگ غالب ہے لیکن اس میں بڑی حرارت ہے ،باربار محبوب سے ملنے کو بے قرار نظر آتے ہیں اور اس تڑپ کو بیان کر تے ہیں ،ان کی شاعری  میں جوش ہے ، غضب کا جذبہ ہے ان کے کلام میں تخیل کی بلندی ،فکری وسعت ،شعری تصورات ،مصرعوں کی ساخت ،لفظوں کی نشست و برخاست اور طرز ادا کا انداز اچھوتا اور دلکش ہے ،شوخی ،شرارت ،بذلہ سنجی ،چٹکیاں  ان کی غزلوں کا خاصہ ہیں جو محسوس کیا اسکو منظوم کرنے میں بلا کی مہارت ہے ، ان کے کلام میں نازک خیالی اور مضمون آفرینی ملتی ہے ،صنعت تکرار کا استعمال بخوبی کیا  ہے وہ اس تکرار سے شعروں میں جان پیدا کردیتے ہیں ، ان کے کلام میں غنائی کیفیت اور نغمگیت کا احساس ان کی موسیقیت  سے رغبت کا پتہ دیتی ہے ، لفظ 'عدو'  ان کے پورے کلام میں جا بجا ملتا ہے ، زبان کی سلاست ،بیان کی سادگی ،بندش کی خوش اسلوبی ان کو دہلی کے استاد  شاعروں کے ہم پلاّ بناتی ہے ،ان کو الفاظ پر غیر معمولی قدرت حاصل ہے ، معاملہ بندی اور مضمون آرائی میں کمال حاصل ہے  ،زبان سادہ ، رواں اور بامحاورہ  ہے ، رگھونندن سنگھ ساؔحر دہلوی ان کے صاحبزادے جنہوں نے ' غالب اور ہاجر ' نامی کتاب میں غالب اور ہاجر کا موزانہ کیا ہے اس میں 'گزارش احوال ' کے  تحت رقم طراز ہیں " مجھے یہ کہنے میں کوئی تامل نہیں ہے کہ جناب ہاجؔر کی غزلیں مرزاغالب کی غزلیات سے کسی صورت بھی کم نہیں ہے بلکہ بعض مقامات پر ان سے سبقت لے گئیں ہیں ،اگر تنگ نظری اور تعصب کو چھوڑ کر انصاف سے کام لیا جائے تو جناب ہاجؔر کواردوزبان کے صف اول کے شاعروں میں شمار کرنا ہوگا اور بلا شک وہ اس کے مستحق ہیں "۔

ہاجر دہلوی  شاعر و حکیم کے علاوہ عمدہ نثر نگار بھی تھے ،انہوں نے ڈرامے اور جاسوسی ناول بھی لکھے ہیں ۔

   حکیم  منشی رگھونا تھ  سنگھ  ہاجؔر   دہلوی  مختصر علالت کے بعد 15 جون 1922ء کو اس دنیا سے رحلت  کرگئے ۔

ہاجر دہلوی  کی  تخلیقات  مندرجہ ذیل ہیں :-

1۔ دیوان ہاجؔر

2۔ نئی روشنی(ڈرامہ)

3۔ شادی خانہ آبادی(داستان و ڈرامہ)

4۔لاش غائب (جاسوسی ناو(