ہاجر دہلوی

 |  دلی, ہندوستان

جانتے ہیں ان کو سب باشندگان لکھنؤ

کہتے ہیں فرحت انہیں پیروجوان لکھنؤ

ہیں بہت باعلم ولائق زندہ دل شیریں زبان

خاندان ان کا ہے نامی درمیان  لکھنؤ

کیا صفت اس شہر  کی کوئی کرے اہل قلم

پڑھتے ہیں ہر دم فرشتے داستان لکھنؤ

اک سے اک بڑھکر ہیں دونوں کیا کہوں کس کی صفت

کیا زمین لکھنؤ کیا آسمان لکھنؤ

اسقدر افراط ہے سبزی ارزاں ہے تمام

غیرتِ باغ ارم  ہے بوستان لکھنؤ

ہے فصاحت اور لسانی کا ان پر خاتمہ

نامزد دنیا میں ہیں جادو بیان لکھنؤ

گومتی کا جل پیا جس نے وہ عورت ہوگئی

ہے زنانی ہند میں نامی زبان لکھنؤ

مرد جو ان کو کہے سمجھو اسے نامرد ہے

مردمی سے دور ہیں باشندگان لکھنؤ

دل ہوا فرحت سے ملکر خوش تو ہاجؔر نے کہا

سارے ہیں جادو بیان باشندگان لکھنؤ