اصل نام بنواری لال اور شعلہ ؔ تخلص تھا ، 25 جولائی 1847ء کو سہارنپور میں پیدا ہوئے ، وہ ہندوؤں میں کائستھ فرقے کے بھٹناگر قوم سے تعلق رکھتے تھے ،ان کے جد امجد رائے نرمل داس کو قانون گوئی وراثت میں ملی تھی ، حصار ہریانہ میں ان کے خاندان کی بہت عزت وشہرت تھی ، ان کا خانوادہ علمی وادبی خانوادہ تھا ، ان کے والد موتی لال بھٹناگر ضلع سہارنپور میں ناظر عدالت کے پیشہ سے وابستہ تھے،لکھنؤ میں ان کے رشتہ کے بھائی منشی کرتا کشن وکیل جو کہ اسلام کی دولت سے سرفراز ہوگئے تھے کچھ دنوں ان کے پاس بھی قیام کیا ، منشی گھمنڈی لال کے مطابق ان کی شاعری کے نقطہ آغاز کے صحیح وقت کا پتہ تو نہیں چلتا لیکن عہد طفولیت ہی سے ان میں یہ رجحان پیدا ہو چلا تھا لیکن وہ اسے کسی پر ظاہر نہیں کرتے تھے ، وہ منشی بال مکند بےصبؔر کے ممتاز شاگردوں میں سے تھے ، 1873ء میں منشی بنواری لال شعلہ کو علی گڑھ میں محکمہ بندوبست میں ملازمت مل گئی تو وہیں مستقل سکونت اختیار کرلی ، یہاں انہوں نے وکالت  کا امتحان پاس کیا اور وکالت بھی کرنے لگے ، علی گڑھ میں ہرگوپال مرزا تفؔتہ سے بھی فیض یابی کا موقع ملا ، انھیں کی وساطت سے مرزا غالؔب تک رسائی حاصل ہوئی ، مگر اکتساب فیض کے کچھ خاص مواقع نہ مل سکے ، یاد رہے منشی بال مکند بےصبؔر اور مرزا تفؔتہ غالب کے مشہور شاگردوں میں سے ہیں ، مرزا تفتؔہ اور غالب کے مابین خط وکتابت بھی موجو د ہے ، علی گڑھ میں منشی چھوٹے خان قیس ؔ سے ان کی معرکہ آرائی کافی مشہور ہے ، 1885ء میں علی گڑھ میں جب کائستھ سبھا کا قیام ہوا تو بنواری لال شعلہ  نے باقاعدہ اس میں شرکت کی اور قوم کے  نام نظم بھی پڑھی،بھارت دھرم مہا منڈل کے جلسہ میں مارچ 1888ء میں شرکت کی اور یہیں سے ان کے مذہبی رجحانات میں تبدیلی پیدا ہونا شروع ہوئی ، بھارت دھرم مہا منڈل کے ملک کے مختلف شہروں میں منعقدہونے والے پروگرامز میں ہر سال شرکت کرنے لگے ، وہ وہاں مسدس ست دھرم ، مسدس پتنی ورتا دھرم پڑھتے تھے ، وندراون(متھرا) میں بھارت دھرم مہا منڈل کے پروگرام میں شرکت کی تو وہاں انہوں  نے اپنی طویل مثنوی “بزم بندرابن “ پڑھی ، وہاں ان کی ملاقات بھارت دھرم مہا منڈل کے صدر دیوان رام جس سی ایس آئی وزیر ریاست کپور تھلہ  سے ہوئی ،وہ اپنے گھر پر بڑے ذوق وشوق سے رامائن کتھا کراتے تھے اور اس میں “مسدس رامائن” پڑھی جاتی تھی  ،انہوں نے اپنی اہلیہ ثانی کی یاد گار کے طور پر ایک مندر " سری گوپیشور مندر " کی تعمیر کرائی جو آج بھی علی گڑھ میں موجود ہے ،1901ء میں محمڈن کالج علی گڑھ میں زبردست مشاعرہ ہوا جس میں مشہور زمانہ شعراء  نے شرکت کی ،ان کو مشاعرے شروع ہونے سے قبل مدعو کیا گیاتھا لیکن طبیعت کی تبدیلی کے باعث اس  کے لئے تیارنہ ہوسکے اس لئے بطور سامع کے شرکت کی ،اس مشاعرے میں منشی امیر اللہ تسلیم ؔ بھی شریک تھے ، منشی ان کو بہت عزیز تھے اور  بحیثیت استاد شاعر بہت عزت واحترام بھی کرتے تھے، اختتام مشاعرہ کے بعد انہوں نے ان سے ملاقات کی ، دوسرے دن شہر میں  منشی امیراللہ تسلؔیم  کی آمد کے موقع پر مشاعرہ منعقد کیاگیا  اور اس میں ان سے شرکت کا وعدہ لیاگیا ، اس مشاعرہ میں انہوں نے بھی غزل پڑھی، بنواری لال شعلہ ؔ کا دیوان “ارمغان شعلہ “ جب شائع ہوا تو وہ لندن تک پہونچ گیا ، کیونکہ اس میں “قصیدہ کلاک ٹاور “ بھی تھا جس کو سر چارلس ہاکس ٹوڈ کراسویتھ لفٹنٹ گورنر  صوبہ جات مغربی وشمالی نے نہایت صفائی اور عمدگی سے چھپوایا تھا اور معززین  حکام و رؤساء میں تقسیم  کیا تھا ، ان کو  پوئیٹ لاریٹ (ملک الشعراء)  بھی بنانے کا بھی ذکر ہوا لیکن وہ پائہ تکمیل تک نہ پہونچ سکا۔

بنواری لال شعلہ زودگوشاعر تھے انہوں سبھی اصناف سخن میں طبع آزمائی کی جس میں غزل ،نظم ، مسدس ، نوحہ ، قصیدہ ، مثنوی ، واسوخت وغیرہ شامل ہیں لیکن وہ بنیادی طور پر غزل کے شاعرتھے ، عمر کے آخری دور میں مذہبی رجحانات کے غلبے کے سبب زیادہ توجہ نظم گوئی کی طرف رہی ، ان کی غزل گوئی میں معنی آفرینی ، معاملہ فہمی ، نازک خیالی پائی جاتی ہے ،انہوں نے اپنی غزلوں میں گردوپیش کے مسائل ،اپنے تجربات اور مشاہدات کو برتا ، ان کے کلام میں تصور ، تخیل ، ناصحانہ رنگ ، رندانہ مزاج ، ضرب المثل ، معرفت ، تسکین ، بےکسی ، موت وزیست کے موضوعات عام ہیں ، اسلام اور ویدک دھرم کی کتابوں کا ان کا مطالعہ کافی گہرا تھا شاعری میں عروض و قوافی میں زیادہ دخل نہ تھا لیکن موزوں اور چست شعر کہنے میں مہارت حاصل تھی ،ان کے کلام میں ان کے سبھی استادوں کی جھلک  ملتی ہے ، مسدس  غایت درجہ زورآور اور پر اثر ہے ، ان کی طویل مثنوی”بزم برندابن “ شہرہ آفاق ہے جس میں انہوں نے کرشن اور رادھا کے والہانہ عشق کو نظم کیا ہے ،مثنوی میں تلمیحات ،تشبیہات اور استعارات کو خوب خوب استعمال کیاہے ، وہ کہیں کہیں اپنے استاد بے صبؔر  سے بھی بازی لے جاتے ہیں ،اس کے علاوہ رامائن ،مہاشیو وغیر ہ پر ان کی منظومات ہیں ،عمومی طور پر انہوں نے اپنوں کے غم میں نوحہ خوانی کی ہے ، انہوں نے فارسیت کے ساتھ ساتھ برج بھاشا، ہندی اور سنسکرت کے الفاظ کا بھی بخوبی استعمال کیا ہے ، زبان صاف ،سادہ اور رواں ہے ، ان کی شاعری میں دبستان  ِلکھنؤ کی نزاکت اور تکلف بھی ہے لیکن ان میں دبستانِ دہلی  کا رنگ نمایاں ہے۔

بنواری لال شعلہ ؔ کا 6 اپریل 1903ء میں رام نومی کے دن حرکت قلب بند ہونے کے سبب انتقال ہوا ۔

مجموعہ کلام  کی فہرست

1۔ بزم بندرابن

2۔کلیات شعلہ