منشی نوبت رائے نظر لکھنوی

 |  لکھنؤ, ہندوستان

کون سے گوشے میں ہے اے تیغ ِ ہندی  تو نہاں

دھوم تھی تیری روانی کی میانِ دوجہاں

غلغلہ تھا خوں فشانی کا تِری کونین میں

کانپتے تھے تیری ہیبت سے زمین وآسماں

تیرا لوہا آگ برساتا تھا بجلی کی طرح

جس کے شعلے تا فلک جاتے تھے وقتِ امتحاں

تو وہ بجلی تھی کہ تیری آنچ سہہ سکتے نہ تھے

الاماں کا شور رہتا تھا میان ِ انس وجاں

کڑکڑاکر جس طرف گرتی تھی ہنگام ِ نبرد

خاک کرتی تھی جلا کر لہلہاتی کھیتیاں

شعلۂ نار جہنم  تیرے آگے سرد تھا

آگ تھی کچھ اس غضب کی تیرے پانی میں نہاں

اے مجسم قہر ! اے شہپر ِ بال  قضا

اے سراپا فتنۂ حشر ،اے بلائے ناگہاں

خونفشانی کی تری شاہد ہے گردوں پر شفق

لالۂ خونیں کفن بسمل ہیں تیرے بے گماں

میان میں رہتی نہ تھی تو اے حسین ِ شوخ و شنگ

چین بے محشر خرامی تجھ کو دم بھر تا تھا کہاں

جب زمیں پر تجھ کو شوخی سے نہ آتا تھا قرار

پوچھتی تھے جاکے گرُدوں پر مزاجِ قدُسیاں

تیرے دم سے تھے نمونے حشر کے میدان ِ جنگ

چال تیری باندھ دیتی تھی قیامت کا سماں