راشد عالم راشد

 |  دوحہ، قطر

درد افسوس اور احساسِ ندامت کا نام

درد اک جوش اور  اعلانِ بغاوت کا نام

درد سینوں میں چھپی پاک محبت کا نام

درد اک چاہ طلب پیاس کی شدت کا نام

درد ہونٹوں پہ ہنسی بن کے مچلتا بھی ہے

درد آنکھوں سے لہو بن کے ٹپکتا بھی ہے

درد پردیس میں خاموش سی یادوں کی کسک

درد مزدور کی محنت  ہے پسینے کی مہک

درد مظلوم کا بس آہ و بکا  ہوتا ہے

درد معصوم کے چہروں پہ لکھا ہوتا ہے

درد دو پل کے لئے  ملنا جدا ہو جانا

درد کا حد سے گذرنا ہے دوا ہو جانا

درد یعقوب کا ہے آمدِ یوسف کی رجا

درد اک صبر ہے ایوب کا تسلیم و رضا

درد ہارون کی دعوت ہے تو موسی کی دعا

درد سے جستجوئے حق بھی چلے سوۓ حرا

درد سے عشق بھی آتش پہ چلے پھول بنے

درد سے دل میں اجالا ہو تو پھر بات بنے

درد ہوتا ہے ہمیں جب بھی  چمن جلتا ہے

درد ہوتا ہے اگر   ہونٹ کوئی  سلتا ہے

درد ہوتا ہے ہمیں پھول کوئی مرجھائے

درد ہوتا ہے کلی جب بھی مسل دی جائے

درد  سے میر کا لہجہ ہو غزل بن جائے

درد  سے ساز بجے گر تو  دیا جل  جائے 

درد سے زندہ ہے دنیا میں تو انساں کا وجود

درد نا آشنا انسان ہے اک سنگِ بے سود