راشد عالم راشد

 |  دوحہ، قطر

وہی ایک قصہ فسانہ جیسا جو کچھ نیا ہو تو لے کے آ

ذرا اپنے ماضی پہ صرف رونے کے کچھ سوا ہو تو لے کے آ

تگ و دو سے اپنا تو کام کر یہی معجزہ سرِ عام کر

یونہی بیٹھ کر ذرا کن فکاں کوئی معجزہ ہو تو لے کے آ

رہِ عشق کا یہ شعار ہے کہیں دشت ہے کہیں خار ہے

کہیں عشق میں گلوں سے بھرا کوئی راستہ ہو تو لے کے آ

یہ کلام اس کا کمال ہے تو سخنوروں سے سوال ہے

جو کلام ایسا ہی دل کشا کوئی دوسرا ہو تو لے کے آ

جو چمن سمجھتے ہیں ہم اسے جہاں گل ہوں کتنے ہی رنگ کے

سو چمن بھی ایک ہی رنگ کا کہیں بن سکا ہو تو لے کے آ