آغا شاعر قزلباش دہلوی

 |  ہندستان

تُم تک آبھی نہ سکوں تُم کو بُلا بھی نہ سکوں

یہ تو کُچھ ایسی دھری ھے کہ اُٹھا بھی نہ سکوں

نقشِ ہستی مِرا دم بھر میں فنا ھوتا ھے

تیری حسرت تو نہیں ھے کہ مِٹا بھی نہ سکوں

مِیٹھی مِیٹھی خلش دی ھے تیرے تِیروں نے

دِل میں رکھ بھی نہ سکوں جان سے جا بھی نہ سکوں

مَیں کھٹکتا ہی رہا کرتا ھُوں اغیاروں کو

تُم سا نازک ھُوں جو نظروں میں سما بھی نہ سکوں

ہلکی ہلکی وہ پِلا ساقی مہوش مُجھ کو

مست رہ بھی نہ سکوں ہوش میں آبھی نہ سکوں

آنکھیں مَل کر تِرے تلووں سے اُٹھاؤں گا تُجھے

میری تقدیر نہیں ھے کہ جگا بھی نہ سکوں

تُم کو اکسیر مُبارک رہے دولتمندو

مَیں وہ ھُوں خاک جو نظروں میں سما بھی نہ سکوں

صفحہء دہر سے کِس طرح مِٹے گِریہء خُوں

حرفِ نَم ھے کہ جو کاغذ سے اُٹھا بھی نہ سکوں

شکوہء ظُلم بھی اِس درجہ گراں ھے شاعرؔ

راز کی طرح زباں تک جِسے لا بھی نہ سکوں