رحمان فارس

 |  اسلام آباد, پاکستان

پھر غزہ کے خال و خد پر خون کا غازہ لگا

اور مَیں چُپ ہُوں ، مری غیرت کا اندازہ لگا

اب صلاح الدین ایُّوبی تو آنے کا نہیں

زندہ رہنا ہے تو اپنے دل کو آوازہ لگا

تیرے گھر تک آ ہی پہنچے گا فلسطینی لہو

قومِ اسرائیل ! اب تُو لاکھ دروازہ لگا

وہ گُلِ نوخیز جو مرجھا رہا تھا دھوپ میں

اپنے خوں میں ڈوب کر کیسا تر و تازہ لگا

جو بکھرتا جا رہا ہے ظلم کے طوفان میں

چشمِ نم کو نسلِ انسانی کا شیرازہ لگا

شاید ایسے تیرے دست و پا کا فالج ختم ہو

اپنے پیکر پر شہیدوں کے کٹے اعضا لگا

غور سے دیکھا تو قتلِ اُمتِ معصوم بھی

مجھ کو فارس اپنی خاموشی کا خمیازہ لگا