منشی نوبت رائے نظر لکھنوی

 |  لکھنؤ, ہندوستان

کثرت سے داغ ہیں جو غم ِعشقِ خال میں

تل بھر جگہ نہیں ہے دل پُر ملال میں

افشاے رازِ عشق جو اشکوں نے کردیا

ڈوبا ہوا ہے دل عرق ِ انفعال میں

رہتی نہیں ہے زلف پریشاں بناؤ سے

بکھری ہے اس لئے کہ پھنسے کوئی جال میں

اے جاں دل کے گورِ غریباں میں آئیے

سب آرزوئیں دفن ہیں گردِ ملال میں

دل کو جو یاد ِ جلوۂ عارض ہے د م بہ دم

روشن ہے شمعِ حسن مکانِ خیال میں

کیا دل دکھاؤگے جو مزہ درد کا نہیں

دم  بھر تو بیٹھو آکے دلِ پُر  ملال میں

ہم کو ہجوم ِ غم بھی غنیمت ہوا نظؔر

سب عیب دل کے چھپ گئے گرد ملال میں