راشد عالم راشد

 |  دوحہ، قطر

دن ہمارے شب گَزیدہ ہو گئے

زخم دل کے آب دیدہ ہو گئے

ہم کہانی سے ہی کیا رخصت ہوئے

مثلِ حرفِ نا شنیدہ ہو گئے

فکرِ فردا اور غمِ امروز میں

ننھے چہرے سِن رسیدہ ہو گئے

میں نے رسما لکھ دیا عالی جناب

وہ تو جیسے اک قصیدہ ہو گئے

اک ذرا سی بات پر میرے حضور

آپ تو خاطر کبیدہ ہو گئے

جن کا طوطی بولتا تھا صبح و شام

آخرش وہ بر گُزیدہ ہو گئے

بکھری زلفیں پکڑے دستِ ناز سے

وہ کہ جب قامت خمیدہ ہو گئے